Spilavist

Vertinn er heldur betur sein að hrökkva í gang eftir jólahátíðirnar og mundi rétt í þessu eftir spilavistinni sem fyrrihuguð var í kvöld. Standa verður við það sem búið er að ákveða og spilasjúkir verða að fá að taka í spilin sín í kvöld og allt verður klárt kl. 21:00. Aðgangseyrir er 500 krónur og spilað er bæði grand og nóló auk þess verður hægt að trompa með spilum af öllum sortum þegar það á við.

Rafmagnað andrúmsloft

Andrúmsloftið var rafmagnað er Þórunn fékk þær fréttir að pabbi hennar hefði ekið á loftlínu sem bar með sér 30.000 volta rafstraum. Hárrétt viðbrögð bóndans í Enniskoti gerðu það að verkum að hann komst heill á húfi frá þessari vá en tvö hross féllu í valinn. Enginn reiknar með því að slíkar línur liggi í þessari hæð og ekki er með nokkru móti hægt að varast slíkt í hríðarbyl um hávetur. Ekki hefði verið spurt að leikslokum ef hann hefði ekki brugðist við með þessum hætti og við erum þakklát að hafa karlinn heilan á húfi.

Tvö hross drápust þegar dráttarvél lenti á raflínu

Reiðtúrinn

Farið var í fyrsta reiðtúr ársins í gær á gæðahrossunum okkar og brokkuðu þeir Brá, Blesi og Tenór með knapa sína með stolti. Þetta eru hreint æðislegir hestar sem fara með okkur eins og hefðarmeyjar. Blesi er tryggur og traustur og ber Vertinn með varúð leiðar sinnar og fetar ljúft og létt áfram veginn. Tenór er vel taminn og hlýðir Elsu, eiganda sínum, í hvívetna og bar hann hana tignarlega um sveitina. Félagi þeirra úr hesthúsunum fékk að fljóta með og bauð Úði Þórunni sæti og brokkaði með reisn okkur við hlið.  Lilja sat Brá út í reiðtúrinn og eins og sjá má á myndinni tekur stelpan sig vel út á þessari moldóttu einstaklega þýðu sóma hryssu. Hvíta snjóbreiðan sem umlukti Víkina lísti upp umhverfið og það gustaði um knapana er þeir þustu um Syðridalinn og þessi ferð toppaði svo sannarlega daginn.

Gleðilegt nýtt ár !

Nýtt ár hefur litið dagsins ljós með miklar vonir og væntingar innanborðs. Ég veit að árið verður viðburðaríkt og mikið tilhlökkunarefni að takast á við verkefni sem framundan eru. Undirbúningur fyrir þorrablótið mun taka allan minn tíma næstu vikurnar og það verður bara skemmtilegt að takast á við það verk. Strax í næsta mánuði mun ég bæta á mig meiri vinnu, því þá helli ég mér út í brudkaup.is af alvöru og vonandi stend ég undir þeim væntingum sem gerðar eru til mín þar. Mikið er lagt undir til að sá vefur nái að dafna og vaxa og með góðra manna hjálp skapast hálft starf í bæjarfélaginu vegna þessa sem hlýtur að teljast gott fyrir bæinn því hvert eitt starf skiptir miklu máli.

Ferming Lilju er svo í vor og það á eftir að renna ljúft og verða skemmtilegt. Andri og Þórunn útskrifast með sumrinu og munu þau án efa bera stúdentahúfurnar sínar með bros á vör. Andri ætlar sér að halda áfram flugnámi sínu og stefna þau skötuhjú á brottflutning til framandi landa á þessu ári því Andri ætlar sér að ná sér í réttindi atvinnuflugmanns svo hann geti hæglega flogið með mömmu sína í helstu tískuborgir veraldar. Elsa námshestur stefnir á að ljúka sínu stúdentsnámi fyrir næstu jól og ef henni tekst það eignast ég þrjá stúdenta á árinu og eitt fermingarbarn og er það mikið ríkidæmi að eiga slíkan fjársjóð.

Lögregluhundur bíður handan við hornið en enginn slíkur er hér á Vestfjörðum síðan Dofri sagði starfi sinu lausu. Dofri er reyndar nátengdur inn í fjölskylduna því hann er sonur gæðahundsins Nökkva sem við áttum til margra ára en hann gegndi starfi lögregluhunds, snjófljóðahunds, vatnaleitarhunds en einnig vann hann að kvikmyndaleik um tíma. Hann lék eitt aðalhlutverk í myndinni ''Í faðmi hafsins" sem runnin var undan rifjum Lýðs læknis og þótti stórgóð á alla kanta og kom hann einnig að myndinni Nóa Albínóa en þar brá honum einungis rétt fyrir eitt augnablik. Í faðmi hafsins lék hann fyrirboða sem breyttist úr sel í hund og komu einstakir leiklistarhæfileikar hans berlega í ljós í myndinni enda var Nökkvi virkilega vel alinn hundur og gerði það sem fyrir hann var lagt af þolinmæði og festu. Nökkvi var alveg frábær skepna en hann var Labrador og alveg einstakur, geðgóður og gæðalegur. Nokkuð ljóst þykir að enginn getur komið í hans stað en sá hundur sem krafsar nú í hurðina hjá okkur verður vonandi blíður og góður eins og hann. Á myndinni hér til hliðar má sá Nökkva "leikara" sminkaðan og flottan í selslíki í myndinni Í faðmi hafsins. Mikil ábyrgð fylgir því að fá sér hund en fjölskyldan er reiðubúin að taka þessum nýja fjölskyldumeðlim, sem kemur til með að sinna mikilvægum störfum innan lögreglunnar, fagnandi.

Aðkoma mín að bæjarstjórnarmálum mun taka einhverjum breytingum á þessu nýja ári enda tími til slíkra verkefna af skornum skammti en ákvörðun þess efnis hefur ekki verið formlega tekin en ákvörðun liggur fyrir innra með mér og henni verður ekki breytt úr þessu.

Hestarnir verða á sínum stað en þeir eru nú komnir í hús og búið að járna og allt klárt til útreiða. Mitt verkefni fram á vorið er að fara í hesthúsin og moka skít, þegar ég er vöknuð og búin að nudda stírurnar úr augunum. Ég er fegin að hafa það verk fyrir höndum og vona að ég verði dugleg að fara í útreiðatúra á þessu nýja ári sem nú hefur litið dagsins ljós.

Áfram mun Vertinn blogga á ævintýralega hátt um það sem verður á vegi hennar og áfram mun Einarshús skipa stóran sess í skrifum títtnefnds Verts og það sem þar gerist. Myndir munu áfram prýða síðuna fyrir lesendur til að njóta og gleðjast yfir. Víkari.is verður á sínum stað öllum þeim til handa sem gaman hafa af jákvæðum og skemmtilegum fréttum frá Bolungarvík

Fyrir utan allt hitt sem ég ætla að gera á þessu nýja ári verður eitt helsta verkefni mitt að sjálfsögðu að hanga edrú allar stundir, alla daga, allan ársins hring og vonandi ber ég gæfu til að standast þær freistingar sem liggja hér og þar og stundum allstaðar og bíða færis að slá mig út af laginu. Ég mun standast Bakkus því annað er óásættanlegur ósigur að mínu mati og ég er staðráðin í að vinna bara  sigra á þessu herrans ári sem gengið er í garð.

Ég óska ykkur að lokum gæfu og gengis á árinu sem nú er runnið upp

Áramótagleði í Kjallaranum

Vertinn í Víkinni mun standa vaktina í kvöld ásamt vinnuhjúum og taka fagnandi á móti gestum sem líta við. Orð götunnar segir að menn ætli að fjölmenna og trúlega munu einhverjir taka í gítar og syngja gleðisöngva. Máninn mun án efa skína hátt á himni hrímfölur og grár enda glottir tungl og hrín við hrönn og hratt flýr stund og nýtt ár heilsar handan hornins.

Húsið opnar klukkan eitt og stendur fjörið fram til klukkan fjögur.

Blikar jólastjarna

Jólastjarnan blikaði skært yfir Bolungarvík í gærkvöldi og nótt og skin hennar lýsti upp Einarshúsið og allt nánasta umhverfi. Ástæðan var augljós því hljómsveitin " Malt og Appelsín" flutti jólatónlist af ýmsu tagi fyrir gesti og gangandi og kvöldið var frábærlega skemmtilegt. Einkar skemmtilegur hópur var samankominn í litla Kjallaranum og allir skemmtu sér hið besta. Það þótti unun að hlýða á þá félaga í hljómsveitinni hræra vöggu okkar hinna með vísnasöng enda var nóttin svo ágæt ein og í allri veröld ljósið skein en þó mest yfir Víkinni. Einnig kom fram í einum texta þeirra í viðlagi að:

 

Í Bolungarvík er barnið fætt

í ástarviku ef vel er gætt.

Hafa englar um það rætt

á bæjarskrifstofunni.

Með vísnasöng ég vögguna þína hræri.

 

Reikna ég fastlega með að þarna sé átt við barnið hans Jóa á Hanhóli sem fæddist í ástarvikunni og dafnar vel samkvæmt nýjustu fregnum. Þess var reyndar getið í framhjáhlaupi að:

 

Fjármenn hrepptu fögnuð þann

sem Grímur óf og Grímur spann.

Lofa nú margir þursinn þann

sem lausnari heimsins væri.

Með vísnasöng ég vögguna þína hræri.

 

 Ekki er úr vegi að geta þess að þrír læknar tilheyrðu þessari grúppu með einum eða öðrum hætti og því var öryggi allra gesta minna gulltryggt enda varð engum misdægurt á meðan hljómsveitin kirkjaði og söng. Lýður tjaldaði hljómfögrum barnalækni fram sem forsöngvara sem lét erindið um mömmu sem klæddi jólasveininn úr öllu nema skegginu hljóma undurblítt um salinn. Jólakveri var dreift á borðin svo gestir gætu sungið með og vel var tekið undir á köflum og hátíðarandi sveif yfir vötnum þó sér í lagi þegar versið eftir John Lennon og Yoko Ono birtist í íslenskri þýðingu og hljómaði svona að hluta til í gærkvöldi:

 

Nú eru jólin og mér líður vel

Hengingarólin á öðrum ég tel

Á morgun er messa sem ég nenni ekki í

svo verða menn hlessa og hneykslast á því.

En guð er svo góður og launþegar hans

kristinhátíðarsjóður kom mér til manns.

 

Malt og Appelsín er stórgóð jólablanda sem inniheldur gamalt vín á nýjum belgjum og er blandan í hárréttum hlutföllum við heildarumfang hljómsveitarinnar sem sló eftirminnilega í gegn á stóra sviðinu í Kjallaranum í nótt sem leið.

 

 

 

Minni Kvenna

Ó, þið yndislegu konur, hvar værum við aumir karlar án ykkar? Þið eruð forsendan fyrir gæfu okkar og ástæða þess að við njótum okkar svo vel sem raun ber vitni. Þið eigið skilið hrós og lof eða eins og stendur í hinu forna kvæði: Móðir, kona, meyja meðtak lof og prís, veskú plís. Það eru ekki litlar kröfur og væntingar sem þið þurfið að uppfylla.  Þið eigið að mennta ykkur og krækja í góðar stöður á vinnumarkaði , vinna fullan vinnudag og samt að eiga snyrtilegt heimili sem gljáir eins og þið væruð í fullu starfi sem húsmæður. - Þið eigið að krækja í góðan mann sem skaffar vel og hlúa að honum og fjölskyldunni í raðhúsi eða einbýlishúsi. Þið þurfið að lesa Séð og heyrt, Mannlíf, Nýtt líf og Vikuna til að fylgjast með svo og Gestgjafanum með öllum  góðu brauðréttunum fyrir saumklúbbinn. Kaupa Hús og Híbýli og horfa á Innlit /útlit, svo að þið fáið brilljant hugmyndir að nýjum lausnum. Svo verðið þið að hlusta á dægurmálaútvarpið og hafa skoðun á pólitík, fylgjast með fréttum, Kastljósi og Silfri Egils.  Þið þurfið að stunda líkamsrækt, jóga og sund, gera slökunaræfingar og grindarbotnsæfingar, boða hollan mat nóg af trefjum og kalki til að forðast beinþynningu. Þið eigið að leggja af, hætta að reykja, huga að umhverfinu, vernda náttúruna og gera safnhaug í garðinum, flokka sorpið, skola mjólkurfernur og geyma í poka,  að ekki sé minnst á álfabikarinn sem allar ábyrgar konur þekkja. Þið þurfið að lesa bæklinginn frá Hagkaup, Elko og Rúmfatalagernum og fylgjast með bestu tilboðunum, standa í biðröðinni í Bónus til að spara 20 krónur á tannkremstúpunni. Kaupa fisk í heildsölu, taka slátur og baka bollur til að eiga í kistunni ef það kæmu óvæntir gestir. Taka til í eldhússkápunum og setja allt í Tuppever dollur af réttri stærð og þurrka svo af með öllum flottu og dýru klútunum sem  þið keyptuð á heimakynningunni. Þið megið þrífa bílinn,  planta haustlaukunum, bera á sumarbústaðinn og vera i honum vegna þess að hann kostar svo mikið. Sinna börnunum, passa að þau mæti í spilatíma, fótbolta afmæli og tannréttingar og helst að fara reglulega í fjöruferðir, göngutúra eða í sund því ef fjölskyldan gerir ekki eitthvað saman fara börnin í hundana og lenda í dópi og rugli. Nú svo þarf að mæta á foreldrafundi, foreldrarölt og hjálpa krökkunum að selja klósettpappír til að komast á pollamótið. Þið berið hitann og þungan af því að rækta ættartengslin við foreldra, systkini, ömmur, afa, gamlar frænkur, börn, tengdabörn, barnabörn, stjúpbörnog fósturbörn , munið alla afmælisdaga, skirnardaga og brúðkaupsafmæli, þó enginn muni eftir ykkur. Þið hlúið að ástinni, rómatíkinni, kryddið tilveruna hugsið um að rækta sambandið við makann, t.d.. með þvi að eiga flotta samfellu og blúndubuxur og fara reglulega í vax og neglur. Þið yndislegu konur, sem alltaf setjið þarfir annarra ofar ykkar eigin þörfum, án ykkar værum við karlmennirnir handalausir, allslausir og vonlausir, núll og nix.Ykkur til heiðurs hefjum við glösin og segjum skál og stígum svo á stokk og syngjum Fósturlandsins Freyja

 

Þetta "Minni kvenna" flutti Einar Guðmundsson svo eftirminnilega á þorrablótinu í janúar sl. og lengi verður í minnum haft. Nýr karlmaður mun fara með minni okkar kvenna á þorrablótinu í næsta mánuði og það er tilhlökkunarefni að sjá hver mun feta í fótspor Einars.                       

               

Skammdegisgleði

Sannkölluð skammdegisgleði mun ráða ríkjum í Kjallaranum á laugardagskvöldið 29. desember. Þá ætlar hin sívinsæla jólablanda " Malt og Appelsín "að kveðja árið með ljúfum jólatónum í bland við dash af kóki og kannski örfáum rúsínum til að fullkomna bragðið. Það eru þeir félagar Lýður læknir, Grímur bæjarstjóri og Benni sundþjálfari sem tilheyra þessari fyrirtaksblöndu einvala tónlistarmanna hér í Bolungarvík auk Halla tölvugúrús og lögguhéra. Er það sérstakt tilhlökkunarefni að fá að berja þessa kappa augum þegar árið er að enda og hlýða á þeirra eðalraddir hljóma undir bassa og gítarspili. Án efa munu englaraddir óma í bland við hörpuslátt í takt við þessa eðaldrengi og ég legg til að sem flestir mæti. Aðgangur er ókeypis og stuðið mun byrja upp úr kl. 22:00 og mun standa eins lengi og þurfa þykir en þó aldrei lengur en (jóla) lög kveða á um í landinu. Á myndinni hér til hliðar má sjá lækninn og bæjarstjórann syngja á stóra sviðinu í Kjallaranum á góðu kvöldi fyrr á árinu. Báðir héldu þeir þokkalegu lagi og þótti hljómfall þeirra félaga nokkuð gott.

Litla jólabarn

Litla jólabarn

Gleðileg jól

Mig langar að óska ykkur öllum gleðilegra jóla og farsældar á komandi ári. Bestu þakkir fyrir þolinmæðina við lestur hugleiðinga minn hér á síðunni og vonandi hafið þið það sem allra best á hátíð ljóss og friðar. Ég sendi að gamni mynd af krökkunum mínum sem tekin var rétt í þessu. Andri er klæddur í kjól og hvítt enda á leið á vakt í lögreglunni. Við erum þó svo heppin að fá hann heim rétt áður en heilagleikinn skellur á í öllu sínu veldi og við verðum sameinuð á hátíðinni ásamt mömmu og pabba sem borða með okkur í kvöld. Allt er klárt, heimilið hreint og strokið og allir tilbúnir til að taka á móti jólunum og þetta verður jafn yndisleg stund og ætíð þegar fjölskyldan sameinast á jólahátíðinni.