Blanda af hinu góða

Gummi Hjalta mátaði sig við stóra sviðið í Kjallaranum á laugardagskvöldið og var fantagóður. Röddin ómaði líkt og englakór væri samankomin undir himnahörpu frelsarans. Þetta er auðvitað orðum aukið en Gummi stóð sig vel og var nokkuð sprækur og hress. Fyrir þá sem voru svo óheppnir að missa af honum geta glaðst yfir því að hann á eftir að koma aftur og aftur og troða upp í þessu húsi glaums og gleði.

Það er ólíkt meira gaman að hafa einhvern sem getur gripið í gítar og sungið á sviðinu í stað þess að leika tónlist úr hljómgræjum hússins ótt og títt. Þess vegna mun Vertinn í Víkinni bjóða upp á slíkt endrum og sinnum og oftar en lesendur hafa tilfinningu fyrir í framtíðinni. Helgi Björns hefur svo sem verið alveg ágætur hingað til en diskurinn með honum er nokkuð vinsæll. Það setur þó töluvert strik í reikninginn að karlinn er alltaf úti að ríða og erfitt að henda reiður á hvort hann ríði berbakt eður ei.

 

Þetta helst....

Að venju hefur verið nóg að gera í lifi margumræddrar. Fjórðungsþing Vestfirðinga nýafstaðið og þótti tilhlýðilegt að Vertinn í Víkinni sæti það ásamt öðrum fyrirmönnum þjóðarinnar. Það gekk hnökralaust fyrir sig og var bara einkar fróðlegt og skemmtilegt.

Fyrsta sprenging í Óshlíðargöngum var sprengd með hvelli á fimmtudaginn og bermálið ómaði um fjallanna hring. Titringurinn var töluverður og steinrunninn tröll tóku kipp af fögnuði er ljóst var að framkvæmdir væru hafnar við göngin. Ákvörðun um að ráðast í þessa framkvæmd var tekin í Kjallaranum í Einarshúsi er þingflokkur Sjálfstæðismanna kom í morgunkaffi á ferð sinni um fjórðunginn. Ekki það að Vertinn er svosem ekkert að eigna sér það sérstaklega enda alkunn af miklu lítillæti og óframfærni, aftur á móti má telja öruggt að það sem þar framfór hafi vakið ráðamenn þjóðarinnar til umhugsunar um nauðsyn þess að gera öruggan veg hér á milli Bolungarvíkur og Ísafjarðarbæjar. Það varð svo ofan á að þessi leið var farin og er það vel og mega þeir sem komu í morgunkaffið í Kjallarann hér um árið eiga heiðurinn af því og engir aðrir.

Vertinn sá um stórveislu vegna þessara atburða og þær Gunna og Guðlaug gerðu kraftaverk eins og svo oft áður. Snittur og aðrar trakteringar voru á borð bornar fyrir alla sem vildu þiggja og vinnuhjú Vertsins í Víkinni stóðu sig með prýði eins og ætíð. Telja má víst að ekki væri hægt að reka Einarshús með öllu því sem því fylgir nema að hafa úrvals starfslið við höndina og títtnefnd má teljast afar lánsöm með vinnuhjú. Allir sem máli skiptir hópuðust svo í hús gleðinnar eftir veisluna síðar um kvöldið og skemmtu sér konunglega enda tilefni til að gleðjast og fagna. Þar nutu veiga menn af fjölmörgum þjóðernum enda eru bormenn Bolungarvíkur eins og heima hjá sér í þessu sögufræga húsi og ætíð velkomnir eins og allir aðrir. Kjallarinn hefur hlotið viðurnefnið "Hákarlabarinn" hjá sumum erlendum fastagestum hússins og ætla má að ástæðan sé hið magnaða sjóara andrúmsloft sem þar ríkir.

Ástin blómstrar svo í húsinu sem aldrei fyrr en hún hefur blundað í húsinu undanfarin hundrað ár og ekki að búast við öðru en að það haldi áfram. Húsið bókstaflega geislar af gleði vegna þeirra fjölmörgu sem líta við til að sýna sig og sjá aðra og kossa, kelerí og kitl þykir sjálfsagt að viðhafa í skúmaskotum og á bersvæði einnig ef svo ber undir.

 

 

 

 

Ævintýri

Dagurinn í dag rann upp bjartur og fagur og beið þess að Vertinn stigi á stokk í öllu sínu veldi. Ævintýrin biðu handan hornsins og kúrðu í hálsakoti haustsins. Bankað var á dyrnar á Einarshúsi um hádegisbilið Vertinum í Víkinni að óvörum enda var húsið galopið og öllum frjáls innganga. Úti fyrir stóðu myndatökumenn með stórar myndavélar til að festa margnefnda á filmu er hún kæmi til dyra. Sjálfstætt fólk stóð glaðbeitt á tröppunum og biðu þess að gáttin á Einarshúsi opnaðist og títtnefnd birtist í öllu sínu veldi.

Það var engin aðdragandi, engin viðvörun, enginn tími til að sletta á sig kyssitaui og ekkert svigrúm til að spegla sig eða flikka upp á sig með einum eða öðrum hætti. Tíminn stóð kyrr eitt augnablik og andardráttur dagsins var varla merkjanlegur. Það vildi þó Vertinum til happs að flökkulæknirinn var með í för enda var hann aðalstjarnan í þessari uppákomu allri saman og er hann rauk með bros á vör inn í hús gleði og sorgar mátti vita að allt væri í stakasta lagi. Í framhaldinu færðist ró yfir margnefnda og doktorinn dró augað í pung og tíminn hélt áfram að tifa.

Míkrófónum og upptökutækjum var slengt á Vertinn og spurt var spjörunum úr á meðan maturinn var eldaður og uppákoman var líkt og margnefnd væri stödd í miðju ævintýri. Það skal ósagt látið hvort nokkuð af viti hafi komið frá téðum Vert í þessu viðtali og ekkert er vitað hvort það komi til með að birtast yfir höfuð en glöggt má þó sjá hve lífið hjá margnefndri virðist eintómur dans á rósum við lokkandi ljúfan vals.

Ef viðtalið birtist í fyllingu tímans er það meiriháttar auglýsing fyrir Einarshús og mun vekja álíka vellíðan hjá téðum Vert og pilluglas sneisafullt af gleðipillum skrifað upp á recept af Dr. Lýð.

 

Pétur og Einar

Leikritið sem hefur slegið í gegn og fjallar um frumkvöðlana Pétur Oddsson og Einar Guðfinnsson heldur áfram í  húsi harma og hamingju í Bolungarvík. Fyrsta sýning haustsins hefst á fimmtudagskvöldið 4. september kl. 20:00 en einnig verða sýningar  fimmtudagskvöldin 11. og 18. september á sama tíma.

Ljúft er að geta þess að hægt er með auðveldum hætti að panta sýninguna fyrir hópa og tilvalið telst fyrir starfsmannafélög sem vilja halda árshátíðir eða afmælisbörn sem vilja bjóða afmælisgestum upp á heillandi sögu sorgar og gleði að slá á þráðinn og festa eitt " show" eða svo. Einnig geta samkomur af öllu tagi pantað ljúffengan mat og notið svo sýningarinnar í framhaldinu og þess sem Einarshús hefur upp á að bjóða.

Í stíl við rest

Segjast verður alveg eins og er að nóg líf og fjör er umleikis hjá Vertinum í Víkinni um þessar mundir. Heimilislífið fjölbreytilegt enda fullt hús fjölskyldumeðlima og lífið er yndislegt og ætlar téður Vert að njóta þess fjölskrúðuga heimilishalds út í ystu æsar meðan það varir. Nýja "barnið" samlagast vel enda virðist hún hæfilega hrekkjótt og gamansöm og alveg í stíl við restina og allt gengur eins og blómstrið eina. Norska er töluð á heimilinu í bland við ensku og íslensku. Bjöguð golffranska er töluð í gríð og erg ef á þarf að halda og töluð er tunga þeirra sem hvorki skilja upp né niður í mæltu máli þegar hentar. Ida og Dollar tala þó alveg sama tungumálið og hundurinn laðast að henni eins og hinum stelpunum á heimilinu og segja má með sanni að hann sé lánsamur hundur.

Af fréttum úr Einarshúsi er þetta helst að nóg er af akkúrat mátulega drykkfeldum verkamönnum í bænum um þessar mundir sem sækja Kjallarann heim eins oft og þurfa þykir einhleypum vestfirskum fljóðum til mikillar ánægju. Án efa myndi einhver líkja ástandinu við ástandið á stríðsárunum er dátarnir mættu í úniformum uppstílaðir og flottir og heilluðu konurnar upp úr skónum en allt er þetta þó undir kontról hjá margnefndri. Ástin blómstrar ennþá í húsi harma og hamingju líkt og undanfarin 100 ár og augnagotur æða brennheitt um salinn og innviðir hússins hrífast með. Ilmur af framandi rakspíra blandast velliktandi angan bolvískra kvenna og lífið er ljúft. 

 

Tilboð í kolageymslunni

Brjálað tilboð verður í gömlu kolageymslunni í kvöld milli 23 og 24. Kolamolinn verður á spottprýs fyrir þá sem mæta tímanlega og lagt er til að bændur og búalið, verkamenn og vinnuhjú mæti ef þeir sjái sér fært. Bifreiðastjórar og bankamenn eru einnig velkomnir sem og gítaristar og götusóparar.

Út og suður

Segjast verður alveg eins og er að yfirbragð allt og útlit Vertsins í Víkinni er snöggtum skárra eftir upphalningu dagsins, þó nauðsynlegt teljist þó að geta þess að útlitið skammaði ekkert upp á yfirbragðið þrátt fyrir allt. Í tilefni af því að dekurrófan í Súðavík opnar Dekurhúsið að nýju þótti upplagt að Vertinn færi fyrst af öllum til að fríska upp á annars úfið hárið og léti laga til í brjálæðislegu yfirþyrmandi krullunum sem leggjast í allar áttir án þess að viðkomandi fái rönd við reist. Nú leggjast lokkarnir í unaðslegum dökkbrúnum liðum með gylltum slöngulokkum á víð og dreif og þökk sé henni Laufey. Eitt sinn þótti téðum Vert það alls ekki fínt að vera krullinhærð, en þakkar núna skapara himins og jarðar fyrir þau forréttindi að fá að hafa liðað hárið þó það standi út og suður og jafnvel norður og niður við hátíðleg tækifæri.

 

Gúllassúpa í hádeginu á föstudag

Hin annálaða gúllassúpa mun verða framborin í hádeginu á morgun, föstudag, og þá er nú virkilega lag að mæta og njóta þeirra veiga sem í boði verða. Legg ég því á og mæli um að menn bjóði starfsmönnum sínum með öllu tilheyrandi í súpu og brauð en einnig mega allir hinir mæta líka meðan húsrúm leyfir og birgðir endast.

Hlakka til að sjá ykkur

 

Ákall til þorrablótskvenna 2008

Þá fer að koma að því að slíta naflastreng þorrablótskvenna sem voru saman í nefndinni árið 2008 endanlega. Til stendur að hittast heima hjá Vertinum í öllu sínu veldi nk. föstudagskvöld og horfa á spóluna sem tekin var á blótinu og dásama hversu frábærar við vorum í alla staði.

Borkonur Bolungarvíkur koma því saman einu sinni enn til skrafs og ráðagerða en ekki er ætlast til þess neitt sérstaklega að þær hafi meðferðis nein tæki og tól, einungis eitthvað góðgæti til að gæða sér á um kvöldið.

Sólrún, Sísí, Jóhanna, Halldóra, Dóra María, Sigga, Alda Karen, Magga, Dísa og Peta...... gerið ykkur klárar fyrir næsta föstudagskvöld því það stefnir allt í feikifjör.

Ef þú, lesandi góður, hittir þessar kerlur á förnum vegi, láttu þær þá vita að þær séu á leið í partý.

Haustdagskráin

Haustdagskráin í Einarshúsi hefur verið í smíðum undanfarið. Hugmyndaflugið hefur algjörlega  hlaupið með margnefnda í gönur og það mun bókstaflega verða boðið upp á ótrúlegustu viðburði á komandi hausti. Íbúar á norðanverðum Vestfjörðum munu verða vel upplýstir þegar þar að kemur en dreyfimiðar verða sendir í flest hús á þessu kalda svæði á hjara veraldar til upplýsinga fyrir bændur og búalið. Krummaskuð vítt og breytt munu ekki fara varhluta af uppákomum í húsi sorgar og gleði og bæir í uppsveitum, innsveitum og vatnsveitum munu fá bréf í fyllingu tímans um það sem verður í boði í framhaldinu. Landpóstar munu hafa nóg fyrir stafni er auglýsingapési Einarshúss fer í dreyfingu á næstu dögum og eins gott að gæta þess að hann lendi ekki í ruslatunnunni eða fari forgörðum með einhverjum hætti. Lesblindir geta fengið bleðilinn borinn á borð líkt og hinir fluglæsu og vonandi fá blindir sýn til að geta lesið sér til um herlegheitin. Hægt verður án efa að lesa auglýsingasnepilinn aftur á bak ef fólki sýnist svo en einnig geta þeir sem eru ekki með fulle femm lesið um atburðina á hvolfi. Þeir sem ekki kunna að lesa yfir höfuð geta hringt í viðkomandi og fengið upplýsingar en útlendingar héðan og þaðan eru hvattir til að læra íslensku svo þeir geti með auðveldum hætti skilið mælt mál á prenti. Eins og þið glögglega getið lesið hér í þessari bloggfærslu er haustdagskráin háleynileg ennþá og ekki birtingarhæf að svo stöddu og því er til mikils að hlakka enda verður allt kapp lagt á að hafa fjölbreytni í boði svo allir finni eitthvað við sitt hæfi.