Pétur og Einar á miðvikudagskvöld

Einleikurinn um eina mestu frumkvöðla Bolungarvíkur þá Pétur og Einar verður sýndur í Einarshúsi miðvikudagskvöldið 30. júlí kl. 20:00. Nú er lag fyrir þá sem ekki hafa séð þennan einstaka leikþátt að mæta og gera sér glaðan dag. Hægt er að kaupa sér rétt af matseðli eða bara kökusneið og heitt súkkulaði og njóta sögunnar. Ekki ætlar Vertinn að skora á neina sérstaka að mæta en hvetur alla þá sem unna menningu og hafa gaman af því að njóta góðrar kvöldstundar að mæta og helst taka alla vini sína og vandamenn með sér.

Dagskrá í Einarshúsi á markaðshelgi

Fjölbreytt dagskrá verður í boði í Einarshúsi á markaðshelgi að vanda enda má vænta þess að fjölmargir verði í bænum þessa helgina. Vertinn í Víkinni er að sjálfsögðu búin að setja saman frambærilega dagskrá og svona hljóðar hið heilaga orð:

Föstudagur 2. júlí - Staður: Kjallarinn

Kl. 23:30: Trúbadorinn Skarpi - Skarphéðinn Haraldsson leikur og syngur frumsamin lög í bland við gamalt og gott. Aðgangur ókeypis.

 

Laugardagur 3. júlí - Staður: Einarshús

Kl. 20:00: Þriggja rétta kvöldverður - Verð 5000,-

 

Laugardagur 3. júli - Staður: Kjallarinn

Kl. 23:00 - 01:00: Tónleikar - Rósin okkar - aðgangur 1000 krónur

 

Sunnudagur 4. júlí - Staður: Bakgarður Einarshúss

Kl. 15:00: Tónleikar - Rósin okkar - aðgangur 1000 kr.

Tónleikarnir verða færir inn ef veður verður ekki til friðs

 

Einarshús bíður matseðil alla daga og vöfflur Völusteins ásamt ýmsu öðru góðgæti.

Amen

 

 

Vinnuhjú

Vinnuhjúin í Einarshúsi standa sína plikt að vanda og halda utan um hús sorgar og gleði frá morgni til kvölds. Nýja vinnukonan Valgerður hefur tekið til starfa og mun standa vaktina í sumar ásamt því fríða föruneyti sem þar starfar alla jafna. Samkomulagið er með betra móti svona dags daglega dags og oftar en ekki glatt á hjalla svo ekki sé meira sagt. Utanveltuháttur Vertsins í Víkinni er þó oftar en ekki aðhlátursefni ungu stúlknanna sem starfa í húsinu, eða Lilju og Bryndísar, sem hvorki skilja upp né niður í ruglingnum sem á sér stað bak við ennið á títtnefndir en það fer þó venjulega vel að loknum. Enn ein vinnukonan er væntanleg til að standa næturvaktina í sumar eða á meðan hún endist hér vestra og raddir herma að hún sé hörð í horn að taka og kalli ekki allt ömmu sína þegar þannig viðrar enda er það nauðsynlegt þegar menn svolgra gleðivökvan meira en góðu hófi gegnir. Hún ber síðan makkann með reisn og heitir Anna. 

Fáninn mun blakta í heila

Fáni Einarshúss mun blakta í heila stöng á húsi harma og hamingju í sumar og vísa veginn á betri veitingahúsið hér vestra. Hann rís svo hátt yfir byggðinni að sjófarendur við Ísafjarðardjúpið munu miða sínar skipaferðir í áttina til hafnar í Bolungarvík til þess eins að fá að berja þetta dásemdar hús augum. Flugvélar reikna stefnuna út frá flagginu og bein leið er frá austri til vesturs út frá staðsetningu fánans svo vænta má töluverðar flugumferðar um himinhvolfið í framtíðinni. Veðurathugunarmenn miða veður og vinda út frá því hvernig fáninn blaktir og hárnákvæm vináttin gefur til kynna úr hvaða átt hann blæs. Hægt er að vita hvaðan raddir vindsins berast með því að líta upp til himins og sjá lógó hússins bærast með vindinum og þá fást svörin við öllum spurningunum. Hitinn frá aldingarðinum færir svo ylinn um bakgarðinn svo hitastigið verður í takt við hjartslátt hússins á sólríkum sólskinsdögum í sumar.

Kalli og Gréta þjóðleg á þjóðhátíðardegi

Mikið verður um dýrðir í Einarshúsi á þjóðhátíðardaginn. Enginn annar en Karl Hallgrímsson mun halda tónleika í bakgarðinum ef veður leyfir og myndlistarkonan Gréta Gísladóttir, konan hans Kalla, mun nota tækifærið og opna myndlistarsýningu í húsinu í leiðinni. Hægt verður að kaupa ilmandi súkkulaði og vöfflur völusteins sem og annað kruðerý sem í boði verður á þjóðhátíðardaginn í Einarshúsi. Tónleikar Kalla verða fluttir í betri stofu hússins ef veðurguðirnir verða með uppsteyt. Hámenningin er algjör í húsi sorgar og gleði að vanda og eru heimamenn sem og aðrir hvattir til að fjölmenna en aðgangseyrir á tónleikanna er þúsund krónur.

Dásemd aldingarðsins

Það þarf ekkert að fjölyrða neitt um það að tónlistarhátíðin "Þorskurinn 2010" sem haldin var í bakgarði Einarshúss á laugardaginn var, tókst glæsilega í alla staði. Himnafaðirinn gerði allt sem í sínu valdi stóð til að veðrið væri eins gott og mögulegt væri og fjölmargir aðstoðuðu við undirbúning og eiga miklar þakkir skyldar fyrir sitt framlag. Tónlistarfólki öllu eru færðar bestu þakkir fyrir að koma fram og leifa gestum að njóta þess sem hver og einn hafði fram að færa með von um að sjá sem flesta af þeim næsta ár. Það er alveg ljóst að þessi hátíð verður að ári með svipuðu sniði og því er lag fyrir þá sem ætla að koma fram að taka sjómannadagshelgina frá og muna að setja sig í samband við títtnefnda í tíma. Vinnukonurnar í Einarshúsi stóðu sig með stakri prýði eins og reyndar allir aðrir en þær frumfluttu lag eftir sig sem heillaði hlustendur en þær prýða myndina hér til hliðar. Fleiri myndir af Þorskinum munu birtast síðar.

Það verður reyndar reynt að nýta sviðið í garðinum eins og frekast er kostur í sumar og konsertar og tónleikar fyrirhugaðir. Karl Hallgrímsson mun hefja tónleikaröðina á þjóðhátíðardaginn og hans ektakvinna halda myndlistarsýningu í salnum svo menningin mun blómstra í húsi sorgar og gleði sem aldrei fyrr. Vikulegar grillveislur verða reyndar í garðinum í allt sumar og fram á haust þegar sjóstangaveiðimenn gera sér glaðan dag og verður það partur af prógramminu þeirra sem er bara skemmtilegt. Þá mun Vertinn þurfa að gera sig skiljanlega á þjóðvesku sem er tungumál sem ekki nokkur maður skilur nema síður sé.

Án efa mun fagnaðarerindið berast með ógnarhraða um heimsbyggðina um dásemdir aldingarðsins og gullna hliðið standa hverjum þeim sem vill koma fram á sviðinu í bakgarði Einarshúss opið eða því sem næst. Hljómsveitir, dúettar, þríettar og fjórettar geta fengið að troða upp þegar þannig viðrar og einsöngvarar eru einnig vel séðir bæði einir og sér en einnig með öðrum. Kórar geta fengið áheyrn og bara allir þeir sem syngja vilja undir berum himni. Veðurguðinn gefur þó ætíð tóninn og harpa himnaföðurins verður að óma í takt við veður og vind til að allt geti gengið upp. Það getur þó hverjum manni verið ljóst að þeir aðilar eru með margnefndri í liði eins og áður hefur komið fram.

og enginn annar en......

Baldur Smári Einarsson mun brýna raddböndin og syngja af hjartans list á Þorskinum 2010

Lítill fugl..

hvíslaði því að Vertinum að Siggi Björns tæki lagið á Þorskinum

Þorskurinn 2010

 Þorskurinn 2010 hefst í bakgarði Einarshúss laugardaginn 5. júni kl. 17:00. Hátíðin nýtur góðs stuðnings Jakobs Valgeirs ehf. sem gefur allan fisk til hátíðarinnar og Vífilfells sem gefur listamönnum alla drykki. Guðmundur Gunnarsson fjölmiðlafýr verður kynnir á hátíðinni. Fjölmargir tónelskir hljómlistarmenn stíga á stokk og leika og syngja fyrir gesti. Aðgangur er ókeypis. Áætlað er að hátíðinni ljúki um kl. 20:00 en þá hefst dýrindis sjávarréttahlaðborð að hætti Arnars Smára og Dæju. Hjörtur Trausta stígur svo galvaskur á stóra sviðið um miðnættið.

Þessir hafa skráð sig til leiks og syngja í þessari röð að öllu óbreyttu:

Lilja og Bryndís

Benni Sig og Elli Ketils eldri

Elísabet Trausta og Bjarni Kristinn

Jón Hallfreð

Halldóra Jónasdóttir

Guðrún Snæbjörg og Jón Sig

Einar Örn

Muggi, Olgeir Hávarðar og Valdi

Steingrímur Rúnar og band

Gummi Hjalta

Hjörtur Trausta

Arnar Guðmundsson blúsmann

Óli Popp

Lýður og Íris

Elfar Logi

Hávarður Olgeirs og band

Siggi Björns

Baldur Smári

Kjallarakeppnin á föstudag

Kjallarakeppnin heldur sínu striki á föstudagskvöldið. Spyrill er Elías Ketilsson.