Sumarið er tíminn

Sumarið er tíminn í húsið sorgar og gleði og senn verður það kvatt með kurt og pí. Gestagangurinn hefur verið ævintýralegur og einstaklega gaman að taka á móti öllum þeim straumi ferðalanga sem hafa áð í Einarshúsi. Mörg þúsund manns hafa þegið trakteringar í húsinu í sumar og oftar en ekki hefur verið mikið um dýrðir. Nú fer þó í hönd krítískur krepputími og téður Vert á það til í taugatitringi að halda að nú fari allt norður og niður þegar haustar og senn verði að loka búllunni.

Það er auðvitað reginfirra enda engin ástæða til uppgjafar þótt á móti blási og metnaðarfull dagskrá að líta dagsins ljós fyrir haustið og komandi vetur. Fastir liðir eins og venjulega verða í boði þar sem spilavistin og kjallarakeppnin hafa sinn sess eins og ætíð.

Ný dagskrárliður sem Vertinn kýs að kalla Kósýkvöld með Ylfu Mist verða mánaðarlega eða því sem næst í vetur en þar ætlar Ylfa ma. að segja neðanmittisdjók og kenna fullorðinsleiki innan velsæmismarka á krúttlegum kvöldstundum. Virkileg tilhlökkun ríkir meðal fullorðins fólks í bænum fyrir þessum kvöldum og miklar væntingar gerðar til þess sem þar fer fram. Vonir standa til að kósýkvöldið geti stuðlað að fjölbreyttu tilhugalífi turtildúfna í bænum sem orsakað geta aukinn áhuga á kósýlegheitum ýmiskonar meðal fólks sem náð hefur tilskyldum aldri til að njóta ásta með hvort öðru. Það yrði auðvitað bylting að geta notið ásta að jafnaði einu sinni í mánuði í stað einnar viku á ári líkt og verið hefur undanfarin ár í Bolungarvík og hver veit nema uppátækið gefi af sér börn og buru í ríku mæli. Þess ber að geta í framhaldi að sjávarréttasúpan sívinsæla verður borðuð undir borðum á kósýkvöldunum og hver veit nema sultan hennar Ylfu fái að fljóta með til bragbætis.

Boðið verður upp á sjávarréttahlaðborð af og til í vetur til að auðga mannlífið og eru heimamenn hvattir til að nýta sér þau sé þess nokkur kostur. Jólahlaðborðin verða á sínum stað en þau verða tvö að þessu sinni ef næg þátttaka fæst. Vænta má þess að húsbandið sem oftar en ekki er halt og blint verði fengið upp á stóra sviðið í tíma og ótíma enda er þar valinn maður í hverju rúmi. 

Þá eru ótalin sagnakvöldin, vinnustaðakynningar og bókaupplestrar á jólaföstu og allt þar á milli. Fastur matseðill mun líta dagsins ljós innan tíðar og stefnt er að því að hann verði sendur í hús á tveggja vikna fresti  og getur þá fólk valið þá daga sem það vill koma og borða. Plokkfiskurinn stendur þó ætíð fyrir sínu á fimmtudögum og svo verður áfram í vetur meðan fiskast.

Af framansögðu má sjá að Vertinn er ekki af baki dottin þó sumir myndu segja að títtnefnd væri gengin af göflunum. Veturinn verður frábær og iðandi lífið yfirþyrmandi í Einarshúsi eins og ætíð og ekkert mun stöðva uppbyggingu hússins eða koma í veg fyrir að það geti vaxið og dafnað. 

Til að toppa tilveruna er títtnefnd farin að blogga á ný, ef marka má skrifin hér á undan, á ævintýralegan hátt sem er gott fyrir téðan Vert. Það er gott fyrir hug og hönd að festa hugarflugið í orð og setningar og halda utan um hversdagslífið með þessum hætti og vonandi verður framhald á.