Heilsufarið

Heilsufarið er ekki gott á téðum Vert um þessar mundir. Útafliggjandi með óstöðvandi hósta og aðra vanlíðan þar sem svitastrókarnir spretta út á ólíklegustu stöðum verða þess valdandi að taugar títtnefndrar eru þandar til hins ýtrasta. Ástand sem þetta fer í þær fínustu enda ekki til eftirbreytni né til þess fallið að auka jafnaðargeð þeirrar sem þetta ritar því næg bíða verkefnin. Til öryggis er náttkjóllinn hvítur og minnir um margt á líkklæði svo það ætti því að vera hægur heimagangur að leggja margnefnda til í kassann ef um ótímabært andlát verður að ræða og spara þannig tíma og fyrirhöfn. Vonir standa þó til að þetta ástand vari ekki um aldur og æfi heldur taki sig upp og hverfi innan tíðar.

 

Athugasemdir

[Katrín, 31.5.2009 kl. 12:24]

æ þig auma Ragna mín...Batakveðjur og góðir straumar