Krúttmagakvöld í Kjallaranum

Krúttmagakvöld fyrir kátar konur verður haldið í Kjallaranum laugardaginn 7. mars næstkomandi. Þar verður fjölmargt í boði fyrir kátar konur og krúttmaga. Breytt útlit verður á sínum stað að vanda en bolvískt fljóð verður tekið í gegn og gert framúrskarandi fallegt með snyrtivörum frá volare og klætt tískufatnaði frá Monroe á Ísafirði. Hárstofan í Bolungarvík mun sjá um litun og greiðslu á þessari stórglæsilegu konu sem verður eins og ný áður en yfir líkur. Gjafir frá volare verða hverri konu til handa en einnig verður happdrætti þar sem ein heppin kona fær veglegan happadrátt frá volare.  Tískusýning verður í boði frá tískuvöruversluninni Monroe á Ísafirði og mun Hárstofan í Bolungarvík koma að greiðslu valinkunnra módela.

Systkinin Bjarni Kristinn og Bryndís Elsa Guðjónsbörn munu flytja tónlistaratriði og ekki má svo gleyma leikþættinum “Súsanna baðar sig” sem sýndur verður í restina sem gæti hugsanlega endað á erótík svo ekki sé meira sagt. Dansarinn vill þó að fram komi að hann tekur ekki við klinki í buxnastrenginn heldur setur hann markið á 500 krónu bleðla. Reikna má með að konur verði að vera fimar til munns og handa er kemur að því að aðtoða dansarann við að klæða sig úr, en lopinn verður teygður til hins ýtrasta þar til kemur að aðalatriðinu. Hljómsveitin margumtalaða “Haltur leiðir blindan” mun svo sjá um að halda úti stuði á stóra sviðinu fram á rauða nóttina.

Húsið opnar kl. 19:00 og borðhald kl. 20:00. Panta þarf miða fyrir 4. mars nk. í síma 456-7901 eða 864-7901 eða senda tölvupóst á [e-mail]. Brýnt er að gera það hið fyrsta því sætafjöldinn er afar takmarkaður.

Borð svigna undir pastaréttum af ýmsu tagi og verð fyrir herlegheitin er 3500 kr.