Hlutverk

Það má teljast nánast öruggt að Kári nokkur Stefánsson hefði viljað eins og eitt eintak af Vertinum, fréttaritaranum og forseta bæjarstjórnar Bolungarvíkur sem allt í senn er sami einstaklingurinn, upp á sitt borð til frekari rannsóknar eftir dagskrá dagsins. Títtnefnd var þríklónuð er hún steig á stokk í íþróttamiðstöðinni Árbæ í dag til að veita gjöfum viðtöku fyrir hönd bæjarstjórnar. Þá hafði margnefnd ný afklæðst klæðnaði Vertsins í Víkinni en veisluföng og trakteringar voru frá Einarshúsi á þessari merku samkomu. Múndering ljósmyndara Víkara.is var lögð til hliðar ásamt myndavélinni rétt á meðan hæstvirt gegndi trúnaðarstörfum fyrir bæjarfélagið og allt í einni svipan var allt þegar þrennt var og allar runnu þessar hrokkinhærðu kerlingar aftur í sama kroppinn að öllu þessu afloknu. Ekki þurfti að hræra í litningum og láta þá gerjast í glasi til að hægt væri að framkvæma þessa flóknu athöfn enda eru Vestfirðingar þekktir fyrir galdra og brellur og enginn sá trixið sem að baki bjó. Sama brosið var brúkað í öll skiptin enda þurfti engu að breyta til að framkvæma gjörninginn og birtist íslensk erfðagreining í öllu sínu veldi við hliðina á þrektækjum íþróttasalarins. Þetta ætti vissulega að teljast til tíðinda ef það væri ekki alþekkt fyrirbæri í litlum sjávarþorpum að sami einstaklingurinn gegni mörgum störfum og sé eins og landafjandinn út um allar trissur. Hver er sinnar gæfusmiður og uppsker eins og hann sáir og á að vera ánægður með hlutskipti sitt í hvívetna þó hann þurfi endrum og eins og sinna mörgum hlutverkum í einu á sama tíma.