Minni Kvenna

Ó, þið yndislegu konur, hvar værum við aumir karlar án ykkar? Þið eruð forsendan fyrir gæfu okkar og ástæða þess að við njótum okkar svo vel sem raun ber vitni. Þið eigið skilið hrós og lof eða eins og stendur í hinu forna kvæði: Móðir, kona, meyja meðtak lof og prís, veskú plís. Það eru ekki litlar kröfur og væntingar sem þið þurfið að uppfylla.  Þið eigið að mennta ykkur og krækja í góðar stöður á vinnumarkaði , vinna fullan vinnudag og samt að eiga snyrtilegt heimili sem gljáir eins og þið væruð í fullu starfi sem húsmæður. - Þið eigið að krækja í góðan mann sem skaffar vel og hlúa að honum og fjölskyldunni í raðhúsi eða einbýlishúsi. Þið þurfið að lesa Séð og heyrt, Mannlíf, Nýtt líf og Vikuna til að fylgjast með svo og Gestgjafanum með öllum  góðu brauðréttunum fyrir saumklúbbinn. Kaupa Hús og Híbýli og horfa á Innlit /útlit, svo að þið fáið brilljant hugmyndir að nýjum lausnum. Svo verðið þið að hlusta á dægurmálaútvarpið og hafa skoðun á pólitík, fylgjast með fréttum, Kastljósi og Silfri Egils.  Þið þurfið að stunda líkamsrækt, jóga og sund, gera slökunaræfingar og grindarbotnsæfingar, boða hollan mat nóg af trefjum og kalki til að forðast beinþynningu. Þið eigið að leggja af, hætta að reykja, huga að umhverfinu, vernda náttúruna og gera safnhaug í garðinum, flokka sorpið, skola mjólkurfernur og geyma í poka,  að ekki sé minnst á álfabikarinn sem allar ábyrgar konur þekkja. Þið þurfið að lesa bæklinginn frá Hagkaup, Elko og Rúmfatalagernum og fylgjast með bestu tilboðunum, standa í biðröðinni í Bónus til að spara 20 krónur á tannkremstúpunni. Kaupa fisk í heildsölu, taka slátur og baka bollur til að eiga í kistunni ef það kæmu óvæntir gestir. Taka til í eldhússkápunum og setja allt í Tuppever dollur af réttri stærð og þurrka svo af með öllum flottu og dýru klútunum sem  þið keyptuð á heimakynningunni. Þið megið þrífa bílinn,  planta haustlaukunum, bera á sumarbústaðinn og vera i honum vegna þess að hann kostar svo mikið. Sinna börnunum, passa að þau mæti í spilatíma, fótbolta afmæli og tannréttingar og helst að fara reglulega í fjöruferðir, göngutúra eða í sund því ef fjölskyldan gerir ekki eitthvað saman fara börnin í hundana og lenda í dópi og rugli. Nú svo þarf að mæta á foreldrafundi, foreldrarölt og hjálpa krökkunum að selja klósettpappír til að komast á pollamótið. Þið berið hitann og þungan af því að rækta ættartengslin við foreldra, systkini, ömmur, afa, gamlar frænkur, börn, tengdabörn, barnabörn, stjúpbörnog fósturbörn , munið alla afmælisdaga, skirnardaga og brúðkaupsafmæli, þó enginn muni eftir ykkur. Þið hlúið að ástinni, rómatíkinni, kryddið tilveruna hugsið um að rækta sambandið við makann, t.d.. með þvi að eiga flotta samfellu og blúndubuxur og fara reglulega í vax og neglur. Þið yndislegu konur, sem alltaf setjið þarfir annarra ofar ykkar eigin þörfum, án ykkar værum við karlmennirnir handalausir, allslausir og vonlausir, núll og nix.Ykkur til heiðurs hefjum við glösin og segjum skál og stígum svo á stokk og syngjum Fósturlandsins Freyja

 

Þetta "Minni kvenna" flutti Einar Guðmundsson svo eftirminnilega á þorrablótinu í janúar sl. og lengi verður í minnum haft. Nýr karlmaður mun fara með minni okkar kvenna á þorrablótinu í næsta mánuði og það er tilhlökkunarefni að sjá hver mun feta í fótspor Einars.                       

               

Athugasemdir

[Ilmur (IP-tala skráð) 28.12.2007 kl. 01:26]

Oh ég fékk alveg gæsahúð og flashback þegar ég las þetta minni kvenna sem Einar flutti svo glæsilega á blótinu í fyrra. Spurning um að flytja ekki lögheimilið suður fyrren um miðjan febrúar og skella sér vestur á blót ;). njé.. ætli það væri nú ekki hálf klént?! Hlakka annars til að koma aftur í Kjallarann til þín, á eftir að sakna þess gríðarlega að kíkja þangað í eina krús eða tvær. Alltaf jafn gaman og kósí. Leiðinlegt að heyra hvernig þorláksmessu lauk - ekki beint í anda jólanna. Vonandi verður hægt að laga gripinn góða, alltaf svo sorglegt þegar svona dýrmætir hlutir skemmast.

Bið að heilsa í Víkina fögru,

Ilmur og co.

[Halla Signý Kristjánsdóttir, 29.12.2007 kl. 13:36]

Frábær pistill! Fósturlandsins freyja og allt það, móðir kona meyja.

svo er til máltæki sem segir "konur eru konum verstar" viss um að það er einhver karl sem bjó þetta til því þeir bera af sér ábyrgð á öllu og þessu líka. En svo átta þeir sig vonandi.

Varandi kvenréttindi og það,, hvernig er með konur í Víkinni, ætlar þessi þorrablótsnefnd EKKERT að gera til að laga mannréttindi hvað varðar þorrablóðið?? eða er hún jafngeld eins og fyrri nefndir?

Konur eru konum verstar!! uuuuhhh er þetta kannski svolítið til í þessu? 

Eða taka af skarið og láta þetta heita réttu nafni alla vegna?

kveðja úr sveitinni!