Ólína Þorvarðar og Helga Vala lesa

Enn á ný var boðið upp á upplestur úr bókum sem út koma fyrir jólin í Einarshúsi. Baldur Smári og Elín mættu galvösk í kjúklingasúpu í hádeginu í dag og einstaklega gaman var að hlýða á lesturinn. Stundin var eitthvað svo notaleg. Baldur las úr bók Einars Más sem ber heitið Rimlar hugans og fjallar ma. um áfengisneyslu rithöfundarins og ferðina inn á Vog. Hann lýsir ástandi álkóhólista svo einstaklega vel og flestir þeir sem hafa átt við áfengis vandamál að strýða finna sig í hverju orði og hverri setningu. Oft hef ég velt fyrir mér þeim einkennum alkóhólisma að kenna alltaf einhverjum öðrum um eigin ófarir og sjá ekki bjálkann í eigin auga fyrir flísinni í auga náungans. Sumir hugsa reyndar þannig þótt þeir bragði sjaldan eða aldrei áfengi og sökkva sér dýpra og dýpra ofan í eigin vorkunnsemi og ólund yfir því hvað allir aðrir en þeir sjálfir eru ómögulegir. Þeir hinir sömu ættu kannski að líta í eigin barm af og til, það myndi án efa létta þeim lífið.

Ólína Þorvarðar og Helga Vala lesa í hádeginu á morgun, föstudag. Þá verður gúllassúpa á boðstólnum og vonandi getum við átt saman notalega stund. Vonandi blæs Kári kuldaboli ekki með sama offorsi og hann gerði í nótt. Vertinn í Víkinni var ræst út kl. 6 í morgun vegna þess að gluggi í Einarshúsi hafði fokið upp og fleira lauslegt var að fjúka. Vökul augu Bolvíkinga vaka yfir þessu merka húsi og passa að ekkert ill hendi það eða skaði.

Ég fæ þó vonandi að sofa á mínu græna eyra í nótt þvi húsbóndinn rennur brátt í hlað frá Reykjavík með soninn og tengdadótturina meðferðis. Gott verður að fá hópinn minn í öruggt skjól heim í heiðardalinn þegar vindur blæs og sjórinn er úfinn.

Mikið hlakka ég til þess þegar ég hef alla mína hjá mér ..........þá eru jólin.

Athugasemdir

[Ólína Kjerúlf Þorvarðardóttir, 14.12.2007 kl. 09:44]

Sæl og blessuð.

Ekki líst mér á veðurútlitið í dag  Eigum við ekki að vera í sambandi um ellefuleytið. Sjáum hvað setur.

[Ragna Jóhanna Magnúsdóttir , 14.12.2007 kl. 10:41]

Blæs nú stíft úr suðaustri og gefur í vindinn frekar en hitt. Vestanvindar mega sín trúlega lítils í slíku. Þú lætur mig vita hvort þú kemur eða ei.

[Ólína Kjerúlf Þorvarðardóttir, 14.12.2007 kl. 11:20]

Sæl Ragna - það hrynur úr hlíðinni. Ég held ég segi pass.

[Ragna Jóhanna Magnúsdóttir , 14.12.2007 kl. 11:29]

Óshlíðargöng hefðu skipt sköpum. Sjáumst í hádeginu á fimmtudaginn.

[Ásthildur Cesil Þórðardóttir, 14.12.2007 kl. 11:39]

Já göngin verða okkur mikil blessun.  Við viljum hafa hana Ólínu okkar áfram hressa og káta.