Súpa og brauð í hádeginu

Á aðventunni verður súpa og brauð í boði í Einarshúsinu við Hafnargötuna og ilmurinn er svo lokkandi.  Gunna mun án efa mæta á nýju skónum og Siggi á síðu buxunum sínum því nú eru að koma jól. Ekki get ég lofað því að Solla mæti í fagnaðinn á bláa kjólnum en aldrei er þó að vita. Eitt er þó öruggt að opið verður frá 11 til 23 alla virka daga fram til jóla og jólaandinn mun svífa yfir vötnum. Öllum er velkomið að kíkja inn og ylja sér við heitt súkkulaði og trúlega verður hægt að fá eitthvað með því. Upplestur á jólabókum mun halda áfram endrum og eins og fer það eftir skapgerð Vertsins í það og það skiptið hverjir koma til með að lesa.