Hvíldardagurinn

Árshátíð starfsmanna Bolungarvíkurkaupstaðar var haldin í gærkvöldi og mikið var um dýrðir í félagsheimilinu af því tilefni. Rúmlega eitthundrað manns þáðu trakteringar og annan velgjörning sem Vertinn í Víkinni og hennar skyldulið reiddi fram með mikilli snilli. Mér er ljúft og skylt að geta þess að allt gekk eins og í sögu og kvöldið gekk eins vel og hægt var að hugsa sér. Þeir sem störfuðu á mínum vegum stóðu sig afskaplega vel enda ekki er við öðru að búast þegar saman eru komin albestu vinnuhjú hér vestra sem kunna vel til verka og vita alveg upp á hár hvernig hlutirnir skulu framkvæmdir.  Ég er mjög stolt af mínu starfsfólki og  tel mig lánsama að hafa þetta fólk í vinnu.

Skemmt er frá því að segja að veislustjórinn fór á kostum og kom Ylfa Mist mér nokkuð á óvart er hún stýrði veislunni styrkri hendi. Hún var bráðsmellinn og stórskemmtileg. Húsið á sléttunni stóð alveg fyrir sínu að vanda og dansað og tjúttað var fram á rauða nóttina. Segja verður þó alveg eins og er að það voru þreyttar mæðgur sem komu heim þegar líða tók á morguninn og í dag er úr okkur allur vindur og tökum við hlutunum því rólega og höldum því hvíldardaginn heilagan í dag. 

Athugasemdir

[Gunna Gumma Hassa (IP-tala skráð) 18.11.2007 kl. 17:51]

Já það má með sanni segja að kvöldið hafi verið gott í alla staði.  Frábær matur og flottur veislustjóri.

kv Gunna DGH

[Ylfa Mist Helgadóttir, 18.11.2007 kl. 22:30]

Ég skil nú ekkert í því að það hafi komið þér á óvart mín kæra????

Takk fyrir matinn, hann var góður.

[Halla Signý (IP-tala skráð) 19.11.2007 kl. 08:25]

Ég er alveg hrikalega hamingjusöm með kvöldið, maturinn frábær, þjónustan góð. Veislustjórinn kom mér ekkert á óvart bara hrikalega skemmtileg, magavöðvarnir aumir við heimkomu. Söngfuglarnir alveg hreint ferlega ljúfir. Ég bara skil ekki hvað hann Bubbi var að hugsa að velja hana Önnu Helgu ekki með sér í liðið bara strax.

En Takk fyrir allt samant