Stebbi og Eyfi

Kvöldinu var varið í Ísafjarðarkirkju og hlustað á ljúfa tóna frá Stebba og Eyfa en þeir voru að fylgja úr hlaði geisladisk sem þeir gáfu út fyrir nokkru. Það þarf ekki að sökum að spyrja að tónleikarnir voru hreint frábærir enda tónlistarmenn á heimsklassa á ferð. Ekki er úr vegi að geta þess að báðir þessir látúnsbarkar eru óttalegir sykursnúðar á sviði og syngja eins og englar í þokkabót. Piltarnir eru lagnir við að senda frá sér ljúfa tóna sem bræða hjörtu miðaldra kvenna og fá þau til að slá út af laginu í taktlausum hjartslætti. Vængjasláttur fugla himins sem prýða altaristöflu kirkjunnar á Ísafirði tónaði vel við lagaval félaganna sem þótti við hæfi á fallegri kvöldstund í fallegri kirkju.

Skemmst er frá því að segja að við áttum saman yndislegar stundir, við áttum saman sól og blóm og hvítan sand. Og skjól á köldum vetri er vindur napurt söng. Og von um gullin ský og fagurt land.

Góða ferð.....................

 

 

Athugasemdir

[Fulltrúi fólksins, 10.9.2007 kl. 11:20]

Ég dauðsé eftir því í dag að hafa ekki farið, þó ég sé enginn sérstakur "Fan" þeirra þá syngja þeir ágætlega og enn betri saman.