Litli skórinn

Við endurbætur á Einarshúsi í síðustu viku fannst lítill barnaskór. Hann virðist vera afskaplega vandaður með festingum fyrir reimar og loðfóðraður fram í tá. Þessi skór hefur líklega verið passandi á sex til átta mánaða gamalt barn og hefur án efa þótt flottur á sínum tíma og ekki keyptur af vanefnum. Ef hann hefur verið settur milli þilja þegar húsið var byggt, sem ég tel líklegt, þá er hann hvorki meira né minna en eitthundrað og fimm ára gamall. Gaman væri nú að geta séð fortíðina ljóslifandi fyrir sér og séð hvaða litlu fætur klæddust þessum hlýja og notalega skófatnaði. Hann hefur án efa yljað litlum tám á köldum stundum.  Ég mun láta útbúa lítinn glerkassa utan um skóinn og varðveita hann fyrir komandi kynslóðir.

 

Hvers vegna ætli barnaskór hafi verið settur á milli þilja á þessum tíma ?

Var það til að tryggja barnalán í húsinu ?

Hver skyldi hafa sett hann þarna ?

Hver skyldi hafa átt hann ?

Veit einhver svar við þessum spurningum?

Athugasemdir

[Alma Karen (IP-tala skráð) 24.7.2007 kl. 10:07]

Ýmislegt kemur í ljós þegar gömul hús eru gerð upp. fyrir nokkrum árum var bróðurdóttir mín að taka í gegn gamalt hús, sennilega um 100 ára gamalt í dag það var norðmaður sem byggði það.  Þar kom í ljós kjötlæri milli þilja, það var auðvita alveg þurrt eftir öll þessi ár hafð bara þornað en ekki skemmst svo það var engin lykt af því svo enginn vissi af þessu fyrr en veggurinn var rifinn.  Ekki er ljóst hvers vegna það var inní veggnum en sennilega tengist það þjóðtrú. Átti það að tryggja að alltaf væri til matur í húsinu eða var það gert til að hafa vætti hússins góða ?   Hver veit.   Núna er lærið á Sjóminjasafninu á Eskifirði,ég veit ekki hvaða skýringar eru með því.    Kveðja Alma