Útskrifuð

Haldiðið ekki bara að Vertinn hafi verið útskrifuð að spítalanum fyrir fullt og fast í dag. Títtnefnd fékk sem sagt spark í rassinn á krabbameinsdeildinni og sagt að hypja sig heim.

Ég varð eiginlega svo hissa að ég vissi ekkert í hvorn fótinn ég ætti að stíga, þetta kom mér svo á óvart því ég hef haldið svo lengi að ég væri á leiðinni heim og bjóst ekkert frekar við því núna. Mig langaði að kyssa mann og annan á deildinni en ég lét það kjurt liggja og valhoppaði út með bros sem náði næstum eyrnanna á milli. Ég mætti Jóni í dyrunum á leiðinni út og hann snerist á hæl í kringum mig og gat ekki annað en fylgt mér fast á eftir er ég rauk út í guðsgræna náttúruna eins og frjáls fuglinn. Það vantaði reyndar að hann yrði útskrifaður af deildinni líkt og ég, því hann hefur tekið fullan þátt í meðferðinni í allan vetur og hefur stutt mig algjörlega í gegnum þessi veikindi mín.

Nú er þetta búið og sex frekar strembnir mánuðir að baki. Samt man ég ekki eftir erfiðu stundunum lengur því það er nánast fennt yfir þær og allt slæmt hefur fallið í gleymsku sem er svo sannarlega gott. Nýir og spennandi tímar eru framundan og til svo margs að hlakka.

Verst er að tengdamamma er búin að spilla mér svo og ég er búin að hafa það svo gott í hreiðrinu hennar að það hálfa væri nóg. Nú þarf ég að fara að gera allt sjálf þegar ég kem heim og það verða viðbrigði. Það mun þó allt komast í eðlilegt horf með tímanum.

Ég mun því koma heim á miðvikudaginn eins og vorfuglarnir enda ekki seinna vænna.

Athugasemdir

[Rósa Sigr.Ásgeirsdóttir (IP-tala skráð) 30.4.2012 kl. 20:16]

TIL HAMINGJU !!! Vertu hjartanlega velkomin heim

[[e-mail] (IP-tala skráð) 30.4.2012 kl. 20:27]

Það fer að vanta prest í Bolungarvík...þú ættir að taka það að þér ert orðin svo ansi lúnkin í ritun og ræðumennsku.

[Katrín, 30.4.2012 kl. 20:47]

Innilegar hamingjuóskir Ragna mín, allt hefst með þolinmæði og góðum skammti af gleðihúmor !

[Íris Sveinsdóttir (IP-tala skráð) 30.4.2012 kl. 23:19]

Til lukku með áfangann, elsku besta Ragna! Áttu góða ferð heim og gleðilegan afmælisdag á morgun ;-)

Hér verða sneiddar kökur og aðrar kræsingar, þér og Jóni 4ra ára til heilla. Ef þú átt leið framhjá, ertu

að sjálfsögðu velkomin :)

[Ylfa Mist Helgadóttir, 1.5.2012 kl. 00:57]

Þetta tilkynnti ég Ömmu Mús, eins og.ég kalla hana og hún fagnaði gríðarlega og sagðist svo alveg hafa vitað þetta. Hefur líklega ekki viljað spilla gleðinni fyrir mér ;-)

Við hlökkum ógurlega til að sjá þig og vertu velkomin heim. Og til hamingju með daginn!

[Ingibjörg (IP-tala skráð) 1.5.2012 kl. 13:57]

Flott.

I.

[Elín þóra (IP-tala skráð) 1.5.2012 kl. 21:50]

Flott hjá þér og til hamingju með daginn.

[Ragnheiður , 2.5.2012 kl. 03:01]

en flott að lesa, til hamingju með þetta :)

[Sóley Vet (IP-tala skráð) 2.5.2012 kl. 08:23]

Æðislegar fréttar! Alveg er ég sannfærð um að þú komir með vorið með þér til okkar hérna fyrir vestan!

Til lukku með áfangann!

[Gróa stefánsdóttir (IP-tala skráð) 5.5.2012 kl. 16:28]

Velkomin heim Ragna mín, og gangi þér allt í haginn, veðurguðirnir fagna greinilega komu þinni á heimaslóðir.