Dagur 57 - miðvikudagur

Vertinn brá heldur undir sig betri fætinum í dag og fór á kuldaskónum og á neglda dreifbýlisfjallabílnum í Kost til Söllenberger og skoðaði úrvalið í amerísku búðinni. Það var eitt og annað til þar sem gaman var að sjá og skoða. Söllenberger sjálfur tók ekkert sérstaklega á móti títtnefndri og hennar skylduliði en hefði án efa verið þarna ef hann hefði vitað af mér. Ég get svosem komið aftur.

Fyrsti bassi í Sinfóníuhljómsveit Íslands og fornvinur Jóns Bjarna, hann Hávarður, einmitt sá hinn sami og hjólaði Vestfjarðahringinn svo eftirminnilega í fyrrasumar til að styrkja verkefnið " Á rás fyrir Grensás" hringdi í dag og bauð okkur á tónleika í Hörpunni annað kvöld með hljómsveitinni og fleirum. Þar eigum við varðveitta miða án efa á besta stað og eftir tónleikanna fáum við leiðsögn um þetta glæsilega hús í boði Háva. Ég geri ráð fyrir því að Halldór Jón, bolvíski húsvörður Hörpunnar láti ljósasjóvið leika lausum hala í byggingunni okkur til heiðurs og í tilefni af heimsókninni. Ég er svo spennt að fara og lyfta mér aðeins upp.

Annars er heilsan bara góð í dag eins og venjulega svosem. Vakti í alla nótt eins og stundum áður en ég ætla að taka eitthvað sem slær mig út í kvöld til að geta sofið svo ég vakni eldhress inn í nýjan dag.

Athugasemdir

[Katrín, 12.1.2012 kl. 01:36]

Gaman að koma í Kost og skoða allar amerísku kræsingarnar og fínerið en mér finnst nú verðlagið eitthvað úr takti við það sem gerist í fyrirheitna landinu:) Gott að heyra að þú sért þokkalega hress og á leið á tónleika. Slík ferð gerir þér örugglega bara gott. Og ertu svo að fara að kíkja vestur mín kæra???? Góðan nótt, sofuðu rótt, Guð geymi þig í alla nótt

[Ragnheiður , 12.1.2012 kl. 07:07]

Það er sko margt að sjá í Kosti, ég skrepp þangað við og við. Kaupi voðalega stórar pakkningar af sápum og öðru sulli. Venjulega er Sullenberger á gólfinu og heilsar vingjarnlega sínum kúnnum. Þú hefur áreiðanlega rétt misst af honum :)

Vonandi nærðu að hvíla þig svolítið.