Með sól í sinni.

Bæjarráðsfundurinn afstaðinn. Farið var yfir drög að samningi vegna Fræðaseturs sem á að hafa aðsetur hér en sá samningur verður lagður fyrir bæjarstjórn á fimmtudaginn. Lagt var fram erindi frá Grunnavík ehf. en höfuðpaurinn þar og yfirskipstjórinn er Frikki Jó og hann hefur verið með bátsferðir á Ramónu yfir í Jökulfirði og Strandir undarfarin sumur. Ég fór með honum til Hesteyrar í sumar og skemmti mér hið besta. Báturinn duggaði við og við en ég lét sem ég væri alvön slíku vaggi og velti og bar mig mannalega. Bréf frá Eygló Harðar fráfarandi formanni þorrablótsnefndar var einnig til umræðu en hagnaður af þorrablótinu var 65 þúsund krónur og var það lagt inn á reikning í sparisjóðnum til stólakaupa í Félagsheimilið. Einnig var farið yfir ferð sem bæjarstjóri og formaður bæjarráðs fóru í með forystumönnum sveitarfélagana á Vestfjörðum nýverið. Þessi fríði flokkur hitti ríkisstjórn Íslands og fór yfir helstu áherslumál okkar í þá veru  að efla og styrkja fjórðunginn.

Mér fannst bæjarráðsfundurinn reglulega góður og gagnlegur, einungis var rætt um það sem skiptir máli og ekkert þar fyrir utan. Ég var svo einstaklega geðgóð að vanda og naut þessa fundar fram í fingurgóma. Sem sagt dásamlegt.

Ég kláraði afmælisbraginn í nótt en hann átti pantað flugfar til suðrænna sólarstranda eldsnemma í morgun svo það var ekki um annað að ræða en að klára hann. Alltaf gott þegar eitthvað klárast. Það tekur reyndar alltaf eitthvað annað við en það er víst gangur lífsins. Ekki væri ég sátt við að vera aðgerðarlaus og sjá ekki fram á nein verkefni í framtíðinni.

Sólin leikur sér að geislum sínum í dag og skín jafnt á réttláta sem rangláta og ægifagurt er um að lítast í Víkinni. Það eru fáir staðir að mínu mati sem hafa á að skipa jafn fallegum fjöllum og þeim sem faðma okkur að sér hér og umvefja okkar yndislegu Vík. Ernirinn, Óshyrnan og Traðarhyrnan gjóa augunum hvert til annars og kinka blíðlega kolli er þau vaka yfir hverju okkar fótmáli. Glöggt má sjá steinrunnin tröll fara fetið upp fjallshlíðar og kletturinn Þuríður breyðir út faðminn mót hækkandi sól.

Finnst ykkur ég ekki vera skáldleg. Ef ég vissi ekki betur þá héldi ég að ég væri Matthías Jochumsson, Bólu Hjálmar eða Hallgrímur Pétursson.

Helgi Seljan er nýjasti bloggvinurinn minn en Hákon bróðir hans er kennari hér og nágranni minn. Ég horfi akkúrat núna inn um eldhúsgluggann hjá honum. Sé ekki betur en að hann hafi verið að maula Cheerios í morgunmat. Hann kemur frá Reyðarfirði og virðist bara vera ágætis drengur.

Ætlaði að segja mikið meira en hætti hér í bili. Ætla út að sleikja sólskinið og hitta skemmtilegt fólk og njóta þess að vera til.