Ljósið

Vertinn hefur lagt leið sína til höfuðborgarinnar sem er svo sem ekki í frásögur færandi og þykja varla fréttir. Tilefnið er þó umfram allt að kveðja bróðurinn hinstu kveðju svo heimsóknin er ekki komin til af góðu og ekki skemmtiferð nema síður sé. Þó mun hún leiða saman vini og vandamenn úr öllum áttum og héðan og þaðan og ekki síst það nánasta og það er þó ljósið í myrkrinu því það er ætíð gott að hitta fólkið sitt þó tilefnið núna sé ekki af hinu góða. 

Það er nauðsynlegt að gleðjast yfir því að ljós sé handan ganganna og mikilvægt að minna sig á það að öll él birtir upp um síðir og lífið heldur áfram eins og ekkert sé. Það er skrýtið til þess að hugsa að ljósið sem lýsti bróðurnum síðustu stundirnar skyldi hafa skinið svo skært á þessum tímapunkti að leiðin yfir hafsins djúp í átt til himna hafi virts sú eina rétta og birtan alltum kring hafi fallið í skuggann og týnst í móðu og mistri. Það er þó eðlilegt að leitað sé í birtuna og ylinn þegar skuggsýnt er og öll sund virðast lokuð og nauðsynlegt er að svara kalli skaparans þegar hann hefur upp raust sína og óskar samvista við viðkomandi.

Þó það sé auðvitað jafn sjálfsagt að fæðast í þennan heim eins og að yfirgefa hann er ólíku saman að jafna. Ætíð er glaðst meira yfir nýju ljósi sem kviknar heldur en þegar loginn slokknar á lífsins kertinu og dimman dettur á. Það er eðlilegt að gleðjast meira yfir hlýju faðmlagi og fagnaðarfundum en að kveðja fyrir fullt og allt, en með aldri og þroska lærist að taka þessum tveimur kostum sem sjálfsögðum hlut enda er hvortveggja nauðsynlegur partur af lífi hvers og eins. Sorgin og gleðin eru systur sem fylgja hverjum manni út í lífið og leiðast jafnan í mótbárum og meðbyr og þær færa hlátur og grátur í bland við sorg og gleði. Leiðin þeirra sem eftir lifa er að sjá ljósið og birtuna allt um kring og umfram allt fyrirgefa og sýna auðmýkt yfir kalli skaparans og þakka fyrir góðar minningar.

Tilhlýðilegt þykir að fá Sálina hans Jóns míns til að leika eitt af uppáhaldslögum títtnefndrar svo rétt til að fá fallega tóna inn í daginn.