Bestu þakkir

Til allra sem tóku þátt í Þorskinum 2009.

Sjáumst hress og kát og miklu, miklu fleiri á Þorskinum 2010

Frábær helgi að baki

Helgin er vægast sagt búin að vera frábær í alla staði. Vertinn hefur reyndar staðið vaktina lengur en góðu hófi gegnir og var orðin ansi framlág undir restina en ætlar bara að sofa eitthvað fram í vikuna til að ná eðlilegu jafnvægi á ný. Það passar nokkuð pent að þegar svefninn verður  orðinn eðlilegur á ný og títtnefnd hætt að vaka á nóttunni og sofa fram á daginn rennur upp ný helgi með nýjum viðburðum og þá snýst þetta allt við á ný. Kærleiksdagar voru í Bolungarvík um helgina sem Vertinn í Víkinni átti stóran þátt í að standa að og tók títtnefnd Kærleiksmessu í Hólskirkju á föstudagskvöldið með trompi og var það góður undirbúningur fyrir komandi viðburði helgarinnar. Kynlegir kostagripir tróðu upp í Kjallaranum síðar um kvöldið og það var ekki að spyrja að því að það tókst með afbrigðum vel og var bráðskemmtilegt.

 

Laugardagurinn rann svo upp í drottins dýrðar faðmi og strax mátti finna ilminn af einhverri spennu í loftinu. Herlegheitin byrjuðu á hádegiskrami með Höllu Signý í hádeginu og þar var öllum boðið í sjávarréttasúpu og komust fleiri þar að en vildu. Vertinn var undir það búin að þurfa að brauðfæða mörg þúsund manns úr örfáum fiskum en það fór þó ekki svo og nóg var af súpu fyrir alla. Engu vatni var breytt í vín fyrr en síðar um kvöldið svo bergvatnið dugði í hádeginu eitt og sér. Fjórar ungar stúlkur buðu upp á tónlistaratriði og voru þær sér og sínum til mikils sóma og hrein unun var á að hlýða. Lilja, Ebba og Anna sungu sig inn í hug og hjörtu þeirra sem hlustuðu og stóðu sig með stakri prýði og það gerði Kristín líka með harmonikkuleik sínum.

 

 

Þorskurinn hófst svo á slaginu fjögur og rann dagskráin ljúft og fór alveg eftir áætlun og skeikaði ekki sekúndu. Svo nákvæm var tímaáætlunin að það var eins og herinn hefði stjórnina en ekki títtnefnd sem var klædd eins og Sigga Vigga, með svuntu og skuplu um hárið sem bundin var úr tóbakskútnum hans pabba og með hárauðan varalit en þannig voru allar vinnukonur hússins klæddar í tilefni hátíðarinnar.  Hver dagskráliðurinn eftir öðrum rann fram hjá á augabragði og frumsamið efni í takt við gamalt og gott, íslenskt og útlent ómaði um Kjallarann. Tuttugu listamenn fengju öskju af þorski fyrir að koma fram og stefnt er að því að tvöfalda þann fjölda af öskjum fyrir Þorskinn 2010 og gera hátíðina enn meiri og stærri. Kjallarinn var troðfullur og fullt var af fólki allan tímann og  það var alveg í takt við væntingar Vertsins. Fullur hugur er á því að halda enn veglegri hátíð næsta ár.

Hjörtur Trausta kom sér svo þægilega fyrir á stóra sviðinu  þegar klukkan sló miðnætti og hann blés vart úr nös fram að klukkan þrjú eða rétt um það bil. Fólk dansaði og duflaði og daðraði, söng og hló og tjúttaði fram á morgun og lífið var ljúft. Þeir síðustu yfirgáfu staðinn er klukkan var ískyggilega langt gengin í morgun en þá mátti Vertinn kveðja hvern gest með kossi eða faðmlagi því það var jú kærleiksnótt og allir vildu knús og kram. Því er Vertinn alveg úr takti við daginn í dag og kemur sér ekki í neitt verk af viti.

 

Einarshúsið lokað

Einarshúsi hefur nú verið lokað svona dags daglega dags og því verður hádegismatur ekki í boði lengur í hádeginu og ekki hægt að fá sér guðdómlegar gulrótar- eða súkkulaði kökur með kaffinu. Áfram verða þó uppákomur í húsinu og aðrir viðburðir og það mun verða auglýst sérstaklega í það og það skiptið. Stefnt er þó að því að húsið standi undir nafni næsta sumar og verði tiltækt ferðamönnum og öðrum þeim sem vilja sækja það heim.

Eyþór Ingi og Andri Ívars

Það eru ekki ómerkari menn en látúnsbarki allra látúnsbarka hér á ísakalda fróni og einn sá besti gítarleikari sem landið hefur fóstrað sem stíga á stokk í Einarshúsi laugardagskvöldið 28. nóvember. Eyþór Ingi og Andri Ívars mæta galvaskir og endurtaka leikinn frá því um markaðshelgina en þá sungu þeir sig inn í hug og hjörtu bæjarbúa og annarra gesta. Þeir sem ekki fengu tækifæri þá til að hýða á þessa kappa mega vera vissir um það að þeir eru algjörlega frábærir.

Enn bætist við Þorskinn

Steingrímur Guðmundsson trommari, Benóný Ægisson rithöfundur, hugmyndasmiður og ofurrótari og Henna Riika Nurmi dansari koma einnig fram á Þorskinum 2009 í Einarshúsi.

Verkefnalistinn

Vertinum tókst að haka við þónokkur atriði í dag sem átti eftir að framkvæma á verkefnalistanum langa. Títtnefnd fékk athafnateyguna um miðjan dag og notaði tækifærið að leggja lokahönd á skipulagningu Kærleiksdaga í Bolungarvík rétt á meðan. Margnefnd fór í Sparisjóðinn með auglýsingablöð sem bera munu hróður Kærleiksdaga um alla norðanverða Vestfirði en sá sami sparisjóður studdi verkefnið dyggilega og gerði það mögulegt að hægt var að láta prenta glæsilegan einblöðung í vistvænni prentsmiðju fyrir sunnan. Það verður gaman að sjá hvernig til tekst með þetta verkefni sem nokkrar valkyrjur í Víkinni ákváðu að fara út í til að þjappa fólki saman og mynda samhug í bænum og minna á kærleik og vonandi taka allir þátt sem vettlingi geta valdið. Vonandi verður bærinn iðandi af lífi og stútfullur og allir kátir og glaðir. Af tilefni Kærleiksdaga má alveg hengja upp jólaseríurnar og lýsa upp sem mest menn mega og eru allir hvattir til þess hér og nú svo ekki sé talað um öll kertin sem eiga að loga hist og her.

Umsókn um styrk til Húsafriðunarnefndar sendist óðfluga til réttra aðila er leið á kvöldið og þótt títtnefnd sé ekkert sérlega bjartsýn á þessum krepputímum þá hefur Vertinn staðið sína plikt í þeim efnum og umsóknin er farin til réttra aðila. Verkframvinda í verkefni sem títtnefnd er þátttakandi í og nefnist Krásir var einnig útfyllt samviskusamlega og send Impru nú í kvöld en þar fékk títtnefn styrk til matartengds verkefnis sem er fólgið í því að láta útbúa matseðil úr sjávarfangi. Beðið er með öndina í hálsinum eftir styrkveitingum Menningarráðs Vestfjarða því þar bíða hvorki meira né minna en þrjár umsóknir um hitt og þetta sem draumur er að láta rætast í Einarshúsi. Reyndar er það ekki alveg rétt að öndin sé í hálsinum því betra er að búast við litlu eða jafnvel engu og gleðjast yfir hverju því litla sem að manni er rétt í það og það skiptið. Styrkir Menningarráðs eru  þó mikilvægir til að styðja við bakið á menningarverkefnum á fjórðungnum og vonandi rennur einhver hluti þeirra til Bolungarvíkur í þessari úthlutun.

Þó verður það að segjast alveg eins og er að algjör viðsnúningur er á sólarhringnum þessa dagana sem getur verið bagalegt, sérstaklega þegar þarf að fara að sofa á kvöldin svo ekki sé talað um að þurfa að vakna fyrir hádegi á morgnana. Því hefur klukkan verið stillt kl. 10:30 í fyrramálið og títtnefnd ætlar að reyna að rífa sig upp þá um miðja nótt og ganga inn í nýjan dag.

 

 

 

Kynlegir kostagripir í Kjallaranum

Kynlegir kostagripir verða í Kjallaranum á föstudagskvöldið í tengslum við Kærleiksdaga í bænum.  Þá munu Guðrún Snæbjörg og Jón Sigurðsson mæta frá Þingeyri og stilla sér upp á stóra sviðinu ásamt húsbóndanum sem tekur í trommurnar. Þá eru menn hvattir til að taka lagið með hljómsveitinni eða bara fá að spila á alvöru sviði á einum flottasta bar landsins, svo Vertinn geri orð Mugisons að sínum. Öllum þeim sem langar að láta ljós sitt skína verða endilega að láta sjá sig þetta kvöld og láta drauminn sinn rætast um að slá í gegn í eitt skiptið fyrir öll. Því er lag að fjölmenna í Kjallarann og láta alla hugsanlega látúnsbarka vita af uppátækinu og einnig þá sem kunna að spila á hljóðfæri og langar að spreyta sig á gömlu góðu lögunum. Þeir sem geta ekkert sungið eru einnig velkomnir en heppilegra telst að hafa lágmarkskunnáttu á hljóðfæri ef slá á nokkra tóna í taumlausu stuði.

 

 

Uppselt

Á jólahlaðborð 4. og 12. desember. Ennþá eru sæti laus á jólahlaðborð þann 12. desember.

Glaðvær gestur við gamla jólatréð

Gleðirécept

Skemmst er frá því að segja að tónleikar Mugisons og Bjögga Gísla voru framúrskarandi og hrein unun á að hlýða. Ekki var svosem við öðru að búast þegar svona tveir þrusugóðir tónlistarmenn leggjast á eitt um að stilla saman strengi sína. Húsfyllir var á tónleikunum og troðfullt út úr dyrum og reikna má með því að hátt í tíu prósent bæjarbúa hafi hlýtt á kappana sem er nokkuð gott ef miðað er við mannfjölda. Búið var að endurraða upp á nýtt í Kjallaranum og breyta þessum gamla verslunarlager í tónleikasal og stemningin var stórkostleg eins og svo oft áður í þessu húsi sorgar og gleði. Það má í raun teljast til stóratburða hvað er að gerast í þessum Kjallara sem var nánast rústir einar bara fyrir fimm árum síðan. Nú sækjast færustu listamenn landsins eftir því að fá að troða þar upp og þykir það bara nokkuð merkilegt að fá að tilheyra þeim hópi sem þar hefur komið fram.

Til að toppa helgina að þessu sinni var ferð á Heilsugæzluna í Arnardal. Þar beið uppáskrifað lyfseðilsskylt résept frá doktor Lýð lækni stútfullt af skellihlátri og skemmtilegheitum. Þar fóru leikararnir Elfar Logi og Margrét Sverrisdóttir á kostum í hlutverkum lækna og sjúklinga og Vertinn í Víkinni fékk bót allra sinna meina og varð alheil á svipstundu. Ekki það að til allrar hamingju er títtnefnd frekar hraust að eðlisfari og er ekki tíður gestur á læknastofum í leit að lækningu á kvillum af ýmsu tagi í tíma og ótíma.

Heldur sú sem þetta ritar að flestir geti séð sjálfa sig í einhverjum af þessum vesalings sjúklingum sem komu á stofuna til læknisins til að fá pillur við hinum ýmsu vanköntum tilverunnar og til að öðlast betra líf og jafnvel hamingju. Það vita auðvitað flestir að hamingjan er ekki fólgin í mixtúrum eða pillum af öllum stærðum, gerðum eða litum, en þær gera auðvitað sitt gagn oft á tíðum eitt augnablik eins og tildæmis þegar náttúran við "Niagra" hefur yfirgefið karlmenn og lágt er á þeim risið og þeir því til lítils gagns en það er nú önnur saga.

Alcohólistinn Ragna Mjöll þótti kunnugleg ekki síst fyrir þær sakir að hún var stuttklædd og glansandi flott en kjóllinn náði rétt niður á mið lærin og pallíetturnar vörpuðu ljóma yfir persónuna. Skórnir voru alskreyttir glimmeri og háu hælarnir gerðu yfirbragð og þokkann líkan þeirri sem alla jafna stendur í gömlu kolageymslunni uppá klædd í stuttan kjól, fagurlega skreytt með glansandi glimmer. Það nær auðvitað engri átt að líka sér við bestu glæsimeyna í leiknum og án efa segir einhver að nú þurfi títtnefnd að fara til læknis og það væri eflaust heillaráð að mati einhverra.

Vertinn í Víkinni er þó búin að átta sig á því að besta leiðin til að halda heilsu er einmitt að fara í leikhús sem þetta, hlægja sig máttlausa yfir kaffibolla og marengstertusneið eftir langan göngutúr um bæinn. Fá að njóta tónleika eins og á laugardagskvöld þar sem frábærir tónlistarmenn léku óaðfinnanlega músík er eins og heilt lyfjabox af gleðipillum, bleikum og bláum og allrahanda. Að fá að dansa lítið eitt og lifa lífinu lifandi með skemmtilegu fólki er álíka örvandi og heilt meðalaspjald örvandi lyfja og að geta svo farið heim og kúrt fram eftir degi er álíka róandi og uppáskrifað pillubox róandi taflna en allt þetta veit auðvitað Lýður læknir mætavel.

 

Jólahlaðborð í Einarshúsi

Vertinn telur tímabært að fara að panta á jólahlaðborði í Einarshúsi enda er ekki ráð nema í tíma sé tekið. Þrjú jólahlaðborð verða í Einarshúsi fyrir þessi jól og vegleg söngdagskrá í boði fyrir gesti en flutt verður úrval laga úr rómantísku leik- og söngdagskránni "Vegir liggja til allra átta" sem Litli leikklúbburinn hyggst frumsýna eftir áramótin en þar verður gripið niður í lög systkinanna Ellýjar og Vilhjálms Vilhjálmssonar.Lifandi tónlist verður svo í Kjallaranum eftir hlaðborðin og leikið og sungið fram á nótt.

Nú þegar er orðið uppselt á jólahlaðborð þann 4. desember. Laust er á jólahlaðborð þann 5. desember og einungis örfá sæti laus þann 12. desember.

Verð er 6500,- á mann og byrjað er að taka á móti pöntunum í síma 456 7901 á opnunartíma Einarshúss